మన పాట.. మన రేడియో...కెవ్వు కేక అనిపించే మన ఆర్జేలు

వినండి.. వినండి.. తొలి తెలంగాణ రేడియో...
విని వినిపించు లైఫ్ అందించు...
ఇది చాలా హాట్‌గురూ.. లాంటి ట్యాగ్‌లైన్లు మర్చిపోండి.
మన పాట.. మన రేడియో.. గుర్తుంచుకోండి..
ఎందుకంటే... బిల్‌కుల్ తెలంగాణ రేడియో మొదలైంది.
ఆన్‌లైన్‌లో సరికొత్త ట్రెండ్‌ని సృష్టించబోతోంది.

ఇప్పుడున్న ఎఫ్‌ఎమ్ రేడియో ప్రసారాల పరిధి కొంత వరకే ఉంటుంది. ఆ ఎఫ్‌ఎమ్ స్టేషన్‌కు 50 నుంచి 60 కిలోమీటర్ల రేడియస్‌లోనే ప్రసారాలుంటాయి. ఆ లిమిట్స్ దాటితే ఎఫ్‌ఎమ్ ఇక వినిపించదు. అంటే ఆ రేడియోలు నగరాలకు, పట్టణాలకు మాత్రమే పరిమితం అన్నమాట. కానీ తెలంగాణ రేడియో అలా కాదు.. ఇంటర్‌నెట్ కనెక్షన్ ఉన్న ఏ కంప్యూటర్‌లోనైనా ఆ ప్రసారాలు వినొచ్చు. అంటే ప్రంపచ దేశాల్లో ఏ మూలన తెలంగాణ వాళ్లు ఉన్నా.. ఆ రేడియోని వినే అవకాశం ఉంది.

గ్లోబల్ ఆన్‌లైన్ రేడియో
ఆన్‌లైన్ రేడియో ప్రపంచవ్యాప్తంగా ఊపందుకుంటున్న ట్రెండ్. ప్రాంతీయ భాషల్లో రకరకాల రేడియోలు ‘వాయిస్’ పోసుకుంటున్నాయి. తెలంగాణ నేపథ్యంలో ‘మన పాట.. మన రేడియో’ అంటూ ప్రారంభమైంది... తొలి ‘తెలంగాణ రేడియో’. మన దగ్గర ఈ నయా ట్రెండ్‌కి తెర తీసింది వరంగల్‌కు చెందిన రాజ్‌కుమార్. ‘ఎఫ్‌ఎమ్ రేడియో ప్రారంభించాలంటే చాలా పెట్టుబడి పెట్టాలి. పైగా దాని పరిధి తక్కువే. అదే ఆన్‌లైన్ రేడియోని ఏ దేశంలోనైనా వినొచ్చు. తెలంగాణ ఉద్యమం కోసం నా వంతుగా ఏదైనా చేయాలనిపించినప్పుడు ఈ రేడియో ఆలోచన వచ్చింది. అనుకోవడం సులభం.. ప్రారంభించడమే కష్టం.. ఏడాది శ్రమ తర్వాత ఈ రేడియో ప్రసారాలు ప్రారంభమయ్యాయి’ అని చెప్పాడు రాజ్‌కుమార్.

అనుభవమే పెట్టుబడి..
వెబ్ రేడియోకి పెద్దగా పెట్టుబడి అక్కర్లేకపోయినా.. ఎంతో కొంత డబ్బు కావాలి.. అదీ లక్షల్లో. కానీ అంత డబ్బు రాజ్‌కుమార్ దగ్గర లేదు. కానీ.. కసి ఉంది.. కసి ఉంటే కాన్సెప్ట్ దొరక్కపోదన్న కాన్ఫిడెన్స్‌తో పనులు మొదపూట్టాడు. అసలు వెబ్‌రేడియో ప్రారంభించాలంటే ఏమేం అవసరం.. వెబ్‌సైట్ కోసం ఒక డొమైన్ కొనుగోలు చేయాలి. వెబ్‌సైటు డొమైన్ల గురించి రాజ్‌కుమార్‌కి ఆల్రెడీ అవగాహన ఉంది. ఎందుకంటే ఆయన అంతకు ముందు తెలంగాణ స్టేట్(tgstate.com) పేరుతో ఒక వెబ్‌సైట్‌ని మొదపూట్టాడు. ఇంకా నిర్వహిస్తున్నాడు. తెలంగాణకు సంబంధించిన చాలా సమాచారం అందులో లభిస్తోంది. ఆ వెబ్‌సైట్ కోసం వేల సంఖ్యలో తెలంగాణ పాటలు కూడా సేకరించాడు రాజ్‌కుమార్. తమ్ముడు ప్రవీణ్ కుమార్ వెబ్‌డిజైనింగ్‌లో దిట్ట. అతని సహకారంతో telanganaradio.com వెబ్‌సైట్ రూపొందింది.

స్టెప్ బై స్టెప్...
తెలంగాణ రేడియో కోసం డొమైన్ రిజిస్ట్రేషన్ అయిపోయింది. వండర్‌ఫుల్ పాటల కలెక్షన్ ఉంది. ఇంకా కావాల్సింది... ఒక స్టూడియో.. అందుకు హైదరాబాద్ తార్నాకలో ఒక ఫ్లాట్ తీసుకున్నాడు. ముంబాయి నుంచి కన్సోల్ తెప్పించాడు. కంప్యూటర్లు.. ఇంటర్‌నెట్.. రెడీ. ఇవన్నీ దశల వారీగా.. డబ్బు దొరికినప్పుడల్లా ఏర్పాటు చేసుకున్నాడు. ఇక వాక్చాతుర్యం ఉన్న ఆర్జేలు.. శ్రోతల నాడి పట్టుకునే ప్రోగ్రామ్‌లు కావాలి. తన మిత్రుడు క్రాంతి కుమార్‌ని క్రియేటివ్ హెడ్‌గా చేర్చుకుని వాటికోసం ప్రయత్నాలు మొదపూట్టాడు. స్నేహితులు, తెలిసినవాళ్ల ద్వారా ఆర్జేగా ఆసక్తి ఉన్న యువతీ యువకుల్ని పిలిపించి.. అందులో ఆరుగుర్ని సెలెక్ట్ చేసుకున్నాడు. తెలంగాణ ‘పాపులర్ ఆర్జే’తో వారికి శిక్షణ ఇప్పించాడు.

సొంత టెక్నాలజీ...
ఆర్జేలు మాట్లాడేందుకు ఆర్మ్ స్టాండ్ మైకులు కావాలి. మైకులైతే దొరకుతాయి.. కానీ ఆర్మ్‌స్టాండ్‌లు బయటి నుంచి తెప్పించాలి. ఖర్చు కూడా ఎక్కువే. అందుకే వాటిని స్వయంగా రూపొందించుకున్నాడు రాజ్‌కుమార్. బయటి సౌండ్ లోపలికి రాకుండా, సౌండ్ రిఫ్లెక్ట్ అవ్వకుండా స్టూడియో గోడలపై ఎకోస్టిక్ ప్లేట్స్‌ని వాడాలి. కానీ వాటి కోసం నాలుగైదు లక్షల రూపాయలు కావాలి. అంత డబ్బు లేదు. గూగుల్‌లో వెతికి వెతికి ఓ టెక్నాలజీని కనిపెట్టాడు. శబ్దాన్ని నివారించాలంటే గోడ ఉపరితలం ఎత్తుపల్లంగా ఉండాలి. అలాంటివి ఏముంటాయి? ఎగ్ ట్రేస్. ఒకప్పుడు అవి అట్టలతో వచ్చేవి. కానీ ఇప్పుడన్నీ ప్లాస్టిక్‌వే వస్తున్నాయి. అట్టాతో చేసినవి దొరకుతాయా? వెతకగా వెతకగా హైదరాబాద్‌లోనే దొరికాయి. స్టూడియో రెడీ అయిపోయింది.

జబ్బర్దస్త్ ప్రోగ్రామ్‌లు..
24 గంటల రేడియో కార్యక్షికమాలు అచ్చ తెలంగాణ యాసలో ఉండాలి. తెలుగు, హిందీ, ఇంగ్లీషు కూడా కలిపికొట్టాలి. 60 శాతం తెలంగాణ పాటలు.. 40 శాతం సినిమా వినోదం.. ఇదీ కాన్సెప్ట్. మస్త్ మార్నింగ్- మస్త్ మజా, బిల్‌కుల్ తెలంగాణ, కెవ్వు కేక ఖతర్నాక్ కాక.. అడ్డా ఆఫ్ అరుంధతి, ఇరానీ ఛాయ్.. సెకండ్ షో.. ప్రోగ్రామ్‌లు డిసైడ్ అయిపోయాయి. తమ మాటలకు పదును పెట్టే పనిలో బిజీగా ఉన్నారు ఆర్జేలు. కొత్త కాన్సెప్ట్‌లు.. శ్రోతల హృదయాల్ని కొల్లగొట్టే తియ్యటి మాటల కోసం అన్వేషిస్తున్నారు. ప్రస్తుతం ఈ రేడియో టెస్ట్ లైవ్ ప్రారంభమైంది. త్వరలో లాంఛనంగా ప్రారంభించే పనిలో బిజీగా ఉంది తెలంగాణ రేడియో టీమ్. ఇంటర్‌నెట్ వినియోగం అందరికీ ఉంటోందా? మన రేడియో అందరికీ రీచ్ అవుతుందా? ఈ డౌట్ చాలామందిది. ప్రారంభమైన ఈ రెండు నెలల్లోనే వస్తున్న ఫోన్ కాల్స్, రెస్పాన్స్, కాంప్లిమెంట్స్ చూస్తే తప్పకుండా సక్సెస్ కాదు.. సంచలనం అవుతుందన్న నమ్మకం ఉందంటోంది టీమ్. ఎందుకంటే తెలంగాణ నుంచే కాదు.. ఆంధ్రా ప్రాంతం నుంచి, విదేశాల నుంచి కూడా ఇప్పుడు ఫోన్ కాల్స్ వస్తున్నాయి.

ఫ్యూచర్...
తెలంగాణ రేడియో.. మన రేడియో. లో రిస్సోస్ నుంచి తక్కువ పెట్టుబడిలో.. క్వాలిటీ రేడియోని అందిస్తున్నాడు రాజ్‌కుమార్. అతన్ని మనం తప్పకుండా అభినందించాలి. ఎలాంటి వేతనం ఆశించకుండా పనిచేస్తున్న ఆర్జేలని అప్రిషియేట్ చేయాలి. మొబైల్ ఫోన్లలో కూడా ఈ రేడియోని అందుబాటులోకి తెచ్చేందుకు ప్రయత్నం చేస్తున్నాడు. ఇందుకోసం ప్రత్యేకంగా మొబైల్ అప్లికేషన్లను రూపొందిస్తున్నాడు. మనలాంటి వారి సహాయ సహకారాలు ఉంటే మన రేడియో మరింత మందికి చేరువయ్యే అవకాశం ఉంది. సహాయం చేయాలనుకునే వారు 92937 49649 నెంబర్‌లో సంప్రదించొచ్చు.