ప్రేమే కదా(కాదు) జీవితం

ప్రేమే కదా జీవితం అంటారు కొందరు. ప్రేమే కాదు జీవితం అంటారు ఇంకొందరు. ఈ రెండూ భిన్న ధృవాలు. రైలు పట్టాలు. ఎప్పుడూ కలవవు. కానీ అవి అతని జీవితంలో కలిశాయి. అదే విధి ఆడిన వింత నాటకం. పది మందీ నేర్పలేని గుణపాఠం.

మాదో చిన్న పల్లెటూరు. వందల్లో ఇల్లు. మందల్లా మనుషులు. ఎవరి పోకడ వారిది. చీమ కదిలినా గుసగుస. అమ్మాయిలతో మాట్లాడటం... అదో పెద్ద తప్పు. నా స్నేహితుని పేరు వెంకట్‌. పెళ్లంటూ చేసుకుంటే ప్రేమించే చేసుకోవాలని వాడిదో కోరిక. కానీ ఏ అమ్మాయీ నచ్చేది కాదు.
వెంకట్‌ హైదరాబాద్‌లో జాబ్‌ చేస్తుండేవాడు. చాలా రోజుల తర్వాత సంక్రాతికి ఊరొచ్చాడు. మా ఊళ్లో సంక్రాంతి క్రీడోత్సవాలు ఘనంగా జరుగుతాయి. అప్పుడు ఊరంతా అక్కడే. కబడ్డీ ఫైనల్స్‌. అందరి కళ్లూ వారిపైనే. కానీ వెంకట్‌ కళ్లు మాత్రం ఎవరికోసమో వెతుకుతున్నాయి. అప్పుడు కనిపించింది ఓ అమ్మాయి లంగా ఓణీలో. సినిమాల్లో తప్ప ఓణీలో అమ్మాయిని చూసి చాలా రోజులైందట. అలానే చూస్తుండి పోయాడు. సడన్‌గా ఆ అమ్మాయి వెంకట్‌ వైపు చూసింది. ఆమె చూపుల్లో కోపం. అతని చూపుల నుండి తప్పించుకోవాలని ఆమె అటూ ఇటూ తిరగసాగింది. కానీ వెంకట్‌ చూపులు ఆమె వెంటే పరుగెత్తాయి. ఎవరా అమ్మాయి? ఆరాతీశాడు. ఆమెది మా ఊరే. పేరు శ్రీలత. వాళ్ల అమ్మానాన్నలకు ఒక్కతే కూతురు. హాస్టల్‌లో ఉండి చదువుకొంటుండేది.
మర్నాడు పొద్దున్నే వెంకట్‌ వాళ్ల ఇంటివైపు వెళ్లాడు. వాళ్ల ఇంట్లో ఒక్కతే ఉందని తెల్సింది. ఇంట్లోకి వెళ్లాడు. మాట్లాడడానికి ప్రయత్నించాడు. కానీ ఆమె మాట్లాడలేదు. బతిమిలాడాడు. భయపెట్టాడు. అయినా మాట్లాడలేదు. ఇరుగుపొరుగు ఇది చూడనే చూశారు. తెల్లారే సరికి ఆ అమ్మాయితోపాటు ఊరంతా తెల్సింది. దీనికి కారణమైన వారిని పట్టుకుని అడిగాడు వెంకట్‌. తన తప్పేం లేదు. నేనే కావాలని వెళ్లానని చెప్పాడు. అదే విషయం వెంకట్‌ని అడగాలని కోపంగా వచ్చిన శ్రీలత మౌనంగా వెనుదిరిగింది. నాదే వారి ప్రేమకు తొలిమెట్టు.
సాయంత్రం కిరాణా కొట్టు దగ్గర కూర్చున్నాడు వెంకట్‌. ఏదో కొనడానికి వచ్చిన ఆ అమ్మాయి అతనితో మాట్లాడింది. "నిన్ను తప్పుగా అర్థం చేసుకున్నాను, నీ ధైర్యం నాకు నచ్చింది.'' అని చెప్పింది. ఆ రోజు వెంకట్‌ ఆనందానికి అవధులు లేవు. మా ఫ్రెండ్స్‌ అందరికీ పార్టీ ఇచ్చాడు. రోజూ సాయంత్రం అతని కోసం దుకాణానికి వచ్చేది. తను మాట్లాడే రెండు మాటల కోసం 24 గంటలు వెయిట్‌ చేసేవాడు. ఇలా రెండ్రోజులు గడిచింది. ఆమెతో చాలా మాట్లాడాలని ఆమె ఇంటికి వెళ్లాడు. తను వద్దంది. వేరే దగ్గర కలుద్దామంది. కానీ అవకాశం దొరకలేదు. ఇంతలో సెలవులు అయిపోయాయి. తను కాలేజ్‌కు వెళ్లిపోతుంది. వెంకట్‌ ఆ రోజు ఆ అమ్మాయి వాళ్ల అమ్మానాన్నలకు తెలియకుండా రైలులో వేరే భోగీలో వెళ్లాడు. వారినే ఫాలో అయ్యాడు. సాయంత్రం వాళ్ల అమ్మానాన్న హాస్టల్‌ నుండి వెళ్లిపోయారు. ఆ తర్వాత వెంకట్‌ కలిశాడు. తను షాక్‌ అయ్యింది. అతడొస్తాడని ఊహించానని చెప్పిందట. వెంకట్‌ తన ప్రేమ విషయం చెప్పాడు. తానూ ఒప్పుకుంది. ఆ తర్వాత వెంకట్‌ హైదరాబాద్‌ వెళ్లాడు. తాను తరచూ ఫోన్‌ చేస్తుండేది. వెంకట్‌ అప్పుడప్పుడు హాస్టల్‌కు వెళ్లి కలిసొచ్చేవాడు.
ఆ తర్వాత ఉగాది పండక్కి ఇద్దరూ వచ్చారు. ఆశ్చర్యం! అప్పటికే వాళ్ల విషయం ఊళ్లో అందరికీ తెల్సింది. మరుసటి రోజు వెంకట్‌తో నేను అమ్మాయి వాళ్ల వీధికి వెళ్తుంటే అందరూ ఆశ్చర్యంగా చూస్తున్నారు. వాళ్ల నాన్న వెంకట్‌ని ఆ వీధికి రావొద్దన్నాడు. ఎందుకు రాకూడదని వెంకట్‌ గొడవపడ్డాడు. మా ముందే శ్రీలతను కొట్టారు. పెద్ద గొడవే అయ్యింది. వెంకట్‌ కూడా గొడవకు దిగాడు. ఈ విషయం వెంకట్‌ వాళ్ల ఇంట్లో తెల్సింది. వాళ్ల నాన్న విషయం అడిగారు. పెళ్లిచేసుకుంటానని చెప్పాడు వెంకట్‌. కొట్టారు. కులం అడ్డు చెప్పారు. హైదరాబాద్‌ వెళ్లిపొమ్మన్నారు. వెంకట్‌ చనిపోవాలనుకున్నాడు. ఆ రాత్రి స్లీపింగ్‌ మాత్రలు మింగాడు. ఆస్పత్రికి తీసుకెళ్లాం. రెండ్రోజులకు తేరుకున్నాడు. తెల్లారే హైదరాబాద్‌ బస్సెక్కాడు.
మళ్లీ ఆమె జ్ఞాపకాలు, వెంకట్‌ మనసు మనసులో లేదు. రెండు రోజుల తర్వాత శ్రీలత చనిపోయింది. ఊళ్లో వాళ్లంతా వెంకట్‌ కోసం ఆత్మహత్య చేసుకుందని పుకారు. కానీ అసలు జరిగిందేంటంటే పరధ్యానంలో ఫ్యాన్‌ను ముట్టుకుంది. కరెంట్‌ షాక్‌కు గురై చనిపోయింది. వెంటనే నేను, ఫ్రెండ్స్‌ హైదరాబాద్‌ వెళ్లాం. వెంకట్‌ శ్రీ లేనిది నేను బతకలేను. చనిపోతానన్నాడు. ప్రేమే కాదు జీవితం. ప్రేమ జీవితంలో ఒక భాగం మాత్రమే. నీకు మంచి భవిష్యత్తు ఉంది దాన్ని పాడుచేసుకోకు అని సర్థిచెప్పాం.
ఆ తర్వాత వెంకట్‌ వాళ్ల నాన్న చనిపోయారు. వెంకట్‌కు ఇద్దరు అక్కలు. ఒక్కడే కొడుకు. కుటుంబానికి ఏకైక మగదిక్కు. ఇద్దరి అక్కల పెళ్లి చేశాడు. తాను పెళ్లి చేసుకోవాలని చూస్తున్నాడు. "మీరు చెప్పింది నిజం రా ఆ రోజు నేను చనిపోతే ఇప్పుడు నా కుటుంబానికి దిక్కు ఎవర్రా.'' అంటాడు వెంకట్‌. ఎంత మార్పు. కాలం మనుషులు ఎంత మారుస్తుంది.

- చంటి