గజానన్స్‌ ఖజానా

పది రూపాయల బిళ్ల కనిపిస్తే పదిలంగా దాచిపెట్టుకుంటాం. ఐదు రూపాయల బిళ్లలే తప్ప నోట్లు కనిపించడం లేదని ఎవరైనా ఒకటి ఇచ్చినప్పుడు దాన్ని పర్సులో పెట్టుకుని మురిసిపోతాం. ఇలాంటివి ఓ నాలుగైదు మన దగ్గరుంటే నలుగురికి చెప్పుకుని గర్వపడతాం. ఆ మాత్రం దానికే అంతలా ఫీలయిపోతే మరి ఈ గజానన్‌ ఎంతలా గర్వపడాలి. ఎందుకంటారా? గజానన్స్‌ ఖజానాలో అలాంటి అరుదైన నాణేలు, నోట్లు చాలా ఉన్నాయి మరి.

పదహారణాల తెలుగమ్మాయి అనడం వినే ఉంటారు. కానీ అణాని ఎక్కడైనా చూశారా? నిజాం కాలం నాటి నాణేలు మ్యూజియంలో కాకుండా బయట ఎప్పుడైనా కనిపించాయా? ఏ దేశం కరెన్సీ నోటు అన్నింటికంటే చిన్నదిగా ఉంటుంది? కలర్‌ఫుల్‌గా ఉండేది ఏ దేశం కరెన్సీ? ఇలాంటి ఎన్నో ప్రశ్నలకు గజానన్‌ దగ్గర సమాధానం దొరుకుతుంది.  అతని దగ్గర 195 దేశాల అరుదైన నోట్లు, 220 దేశాల నాణేలు ఉన్నాయి. ఒక్కో నోటుకు ఒక్కో కథ ఉంటుంది. ఒక్కో నాణేం వెనుక ఒక్కో చరిత్ర ఉంది. వాటిని చూపిస్తూ ఆనందంతో గజానన్‌ చెబుతుంటే చిన్నప్పుడు చరిత్ర పాఠాలు చెప్పిన సోషల్‌ టీచర్‌ గుర్తొస్తాడు.

ఎప్పట్నించి?
గజానన్‌ నాన్న రఘు మహబూబ్‌నగర్‌లో డాక్టర్‌. వారి ఆస్ప్రతి పక్కనే వాళ్లకు ఒక మెడికల్‌ షాపు ఉండేది. గజానన్‌ ఆరో తరగతి చదువుతున్నప్పుడు స్కూల్‌ నుంచి వచ్చాక మెడికల్‌ షాపులో కూర్చునేవాడు. గల్ల పెట్టెలో ఉండే చిల్లరని లెక్కపెడుతూ ఆడుకుంటుండేవాడు. ఒకటి, రెండు, ఐదు రూపాయల బిళ్లలు చాలా ఉండేవి. కానీ అన్నీ ఒకలా ఉండేవి కావు. ఎందుకలా? అతనిలో ఆలోచన మొదలైంది. ఆ ఆలోచన నుంచే పుట్టింది ఒక హాబీ. అదే నాణేలను సేకరించడం. పదో తరగతి పూర్తయ్యేసరికి అది అతని జీవితంలో ఒక భాగం అయిపోయింది. అతని స్నేహితులు, బంధువులు అందరికీ అతని హబీ గురించి తెలిసిపోయింది. ఎవరికి ఏ అరుదైన నాణెం, నోటు కనిపించినా వెంటనే గజానన్‌కు పంపించేవారు. గజానన్‌ బంధువులు, వాళ్ల నాన్న స్నేహితులు చాలామంది విదేశాల్లో ఉన్నారు. వారు కూడా అక్కడి కరెన్సీని పంపించేవారు. అలా 2006లో ఇంజనీరింగ్‌లో చేరేసరికి 50 రకాల నోట్లు, మరో 50 అరుదైన నాణేలు అతని సొంతమయ్యాయి.

విదేశాలకు వెళ్లి...
హైదరాబాద్‌లో ఇంజనీరింగ్‌ చదువుతున్నప్పుడు ఇంటర్‌నెట్‌లో వెతికి చాలా రకాల కాయిన్స్‌ గురించి తెలుసుకునేవాడు. నాణేలు సేకరించే అలవాటు ఉన్న వ్యక్తులను కలిసి సలహాలు తీసుకునేవాడు. ఇంజనీరింగ్‌ పూర్తయ్యాక ఎం.ఎస్‌. చేయడానికి న్యూజిలాండ్‌ వెళ్లాడు. పార్ట్‌టైమ్‌ జాబ్‌ చేస్తూ ఆ డబ్బును కాయిన్స్‌ కలెక్షన్‌కు వినియోగించేవాడు. చదువు పూర్తయ్యాక ఆస్ట్రేలియా, థాయ్‌లాండ్‌, మలేషియా దేశాలు తిరిగి చాలా నాణేలు, నోట్లు సేకరించాడు. కొన్ని వేలం పాటలో కొన్నాడు. కానీ అవి తర్వాత నకిలీవి అని తెలిశాక ఎంతో బాధపడ్డాడు. మొత్తానికి పదేళ్లు కష్టపడి 195 దేశాల నోట్లను, చిన్న చిన్న దేశాలతో కలిపి 220 దేశాల నాణేలను సేకరించాడు. అందుకు అతనికి అయిన మొత్తం ఖర్చు ఎనిమిది లక్షల రూపాయలు. వాటి మొత్తం బరువు 32 కిలోలు. వాటన్నింటిని 2010 ఆగస్టులో హైదరాబాద్‌లో ఎగ్జిబిషన్‌కు పెట్టాడు. మంచి స్పందన లభించింది. అప్పుడే అతనికి బాగా అర్థమైంది తాను సంపాదించినవి ఎంత అరుదైనవో.

స్పెషల్స్‌
గజానన్‌ సేకరించిన నోట్లు, నాణేలలో అరుదైనవి ఎన్నో ఉన్నాయి. మొదటి, రెండో ప్రపంచ యుద్ధ సమయాల్లో వాడిన నోట్లు, జింబాబ్వే వారి ఒన్‌ హండ్రెడ్‌ ట్రిలియన్‌ డాలర్‌ నోటు, మిలీనియమ్‌ ప్రత్యేక నోటు, మన దేశంలో పోర్చుగీసు, ఈస్ట్‌ ఇండియా కంపెనీల కాలంలో చలామణిలో ఉన్న నోట్లు, వినాయకుని బొమ్మ ఉండే ఇండోనేషియా నోటు, కలర్‌ఫుల్‌గా ఉండే స్విట్జర్లాండ్‌ నోటు, ఏడో నిజాం కాలంలో వాడిన నోట్లు తన దగ్గర ఉన్న నోట్లలో అపురూపమైనవని చెప్పాడు గజానన్‌. మాల్వా, ఔరంగజేబ్‌, రాజరాజ చోళ, టిప్పు సుల్తాన్‌, అక్బర్‌, హిట్లర్‌ల కాలంలో చలామణిలో ఉన్న వెండి, రాగి నాణేలు హైదరాబాద్‌ సంస్థానంలోని వెండి నాణేలు, రిజర్వ్‌ బ్యాంక్‌ ఆఫ్‌ ఇండియా విడుదల చేసిన 50, 100 రూపాయల నాణేలు కూడా అతని దగ్గర ఉన్నాయి.

లిమ్కా బుక్‌ ఆఫ్‌ రికార్డ్స్‌లో 150 దేశాల నాణేలు సేకరించనతనిదే రికార్డుగా ఉండేది. ఆ రికార్డుని గజానన్‌ ఎప్పుడో బ్రేక్‌ చేశాడు. లిమ్కాకు దరఖాస్తు చేసుకోకపోయినా మరో ఐదు దేశాల నోట్లు సంపాదించి ఏకంగా గిన్నిస్‌ రికార్డునే కొట్టాలని చూస్తున్నాడు గజానన్‌. ఇవన్నీ చేస్తూ కూడా గజానన్‌ హైదరాబాద్‌ వెస్ట్‌ మారెడ్‌పల్లిలోని లెరా టెక్నాలజీస్‌లో సాఫ్ట్‌వేర్‌ ఇంజనీర్‌గా పనిచేస్తున్నాడు.