మొబైల్ ఫోన్ పోయిందా డోంట్ వర్రీ

గడిచిన కాలం.. వదిలిన బాణం..

ఆడిన మాట..

పోయిందేదీ తిరిగిరాదు..

కానీ సెల్‌ఫోన్.. టాబ్లెట్.. ల్యాప్‌టాప్.. ఇలాంటివి పోతే తిరిగి రాబట్టు కోవచ్చు.

పోయిన వాటిని రికవరీ చేసే పోలీసుల్లా పనిచేసే కొన్ని టెక్నికల్ అప్లికేషన్స్

గురించి..

గాడ్జెట్స్ అంటే టెక్ సావీలకు చాలా ఇష్టం. వేలకు వేల రూపాయలు ఖర్చు చేసి ఇష్టమైన వాటిని సొంతం చేసుకుంటుంటారు. కానీ అవి ఎక్కడైనా పోతే? ఎవరైనా దొంగిలిస్తే? డబ్బుల గురించే కాదు.. అందులో ఉన్న డేటా గురించి కూడా బాధపడాల్సిందే. కాదు.. కాదు.. ఇప్పుడు అంత సీన్ లేదు. ఒకే ఒక్క క్లిక్‌తో దాని ఆచూకీ కనిపెట్టొచ్చు. అదెలాగో చూడండి.

మొబైల్ ఫోన్

ఆండ్రాయిడ్ ఫోన్

పోగొట్టుకున్న మొబైల్ ఫోన్ ఆచూకీ కనిపెట్టడానికి అవస్త్ ఫ్రీ మొబైల్ సెక్యూరిటీ (avast free mobile security) ఉపయోగపడుతుంది. కాకపోతే ఈ ఫెసిలిటీ కేవలం ఆండ్రాయిడ్ ఆపరేటింగ్ సిస్టమ్‌తో పనిచేసే మొబైళ్లలో మాత్రమే ఉంటుంది. అవస్త్ అందించే యాంటీ తెఫ్ట్ సెక్యూరిటీని ఎనేబుల్ చేయగానే ఇన్‌విజిబుల్‌గా అప్లికేషన్ పనిచేస్తుంది. దొంగిలించిన వాళ్లు దీన్ని డిజేసేబుల్ చేయడం సాధ్యం కాదు. పెద్ద సౌండ్‌తో సైరన్ మోగే ఫెసిలిటీ కూడా ఉంది. పీజీఎస్ సర్వీసుతో మొబైల్‌ని ట్రాక్ చేయొచ్చు. గూగుల్‌ప్లే స్టోర్ నుంచి దీన్ని ఇన్‌స్టాల్ చేసుకోవచ్చు.

యాంటీడ్రాయిడ్ తెఫ్ట్ (antidroidtheft) : ఇది జీపీఎస్ సర్వీసుతో పోయిన మొబైల్ ఫోన్‌ని ట్రాక్ చేస్తుంది. మొబైల్ కెమెరాని యాక్టివేట్ చేసి ప్రస్తుతం దాన్ని ఎవరు వాడుతున్నారో వారి ఫోటోలు తీసి పంపుతుంది. దీన్ని కూడా గూగుల్ ప్లే స్టోర్ ఆండ్రాయిడ్ మార్కెట్ నుంచి డౌన్‌లోడ్ చేసుకోవచ్చు.

సిమ్ వాచర్ ప్రో (sim watcher pro) : ఎవరికైనా ఫోన్ దొరకగానే ఏం చేస్తారు? సిమ్‌కార్డ్ తీసేసి వాడుకుంటారు. అలా సిమ్‌కార్డ్ మార్చే వీలు లేకుండా సిమ్ వాచర్‌ప్రో ఉపయోగపడుతుంది. మార్చిన సిమ్ నెంబర్‌ని మీరు ఎంచుకున్న మొబైల్ నెంబర్‌కి ఆటోమాటిక్‌గా మెసేజ్ చేస్తుంది. దీన్ని కూడా గూగుల్ ప్లే స్టోర్ నుంచి పొందొచ్చు.

బ్లాక్‌బెర్రీ ఫోన్
బ్లాక్ బెర్రీ వాడేవాళ్లు బ్లాక్‌బెర్రీ ప్రొటెక్ట్‌ని వాడుకోవచ్చు. ఇది మీ ఫోన్ ఏ లొకేషన్‌లో ఉందో తెలుసుకోవడానికి ఉపయోగపడుతుంది. అంతే కాకుండా పోయిన మొబైల్ ఫోన్‌లో మీ డేటాని ఆన్‌లైన్ క్లౌడ్ స్టోరేజీలోకి బ్యాక్‌అప్ చేసిపెడుతుంది కూడా. దీనికోసం బ్లాక్ బెర్రీ వెబ్‌సైట్‌ని సందర్శించండి.
(http://m.blackberry.com/protect)

విండోస్ ఫోన్
విండోస్ మొబైల్ వాడేవాళ్లు ఫోన్ సెట్టింగ్స్‌లోని ఫైండ్ మై ఫోన్‌లోకి వెళ్లి సేవ్ మై లొకేషన్ ఎవ్రీ ఫ్యూ అవర్స్ (Find My Phone-> Save my Location Every few hours) అనేది ఎంచుకొని ఉంచాలి. అది మొబైల్ పోయినప్పుడు ట్రాక్ చేయడానికి ఉపయోగపడుతుంది.
దీన్ని www.windowsphone.comలో అప్‌డేట్ చేయాలి. మీ ఫోన్ పోయినప్పుడు లాగిన్ అయ్యి My phone-> Find My Phone లో మ్యాప్‌పై లోకేషన్‌ను చూడొచ్చు. మీ పాస్ట్‌వర్డ్ ఎంటర్ చేసి ఫోన్‌ని లాక్ చేసేయొచ్చు.

ల్యాప్‌టాప్

ల్యాప్‌టాప్‌ను ఎవరైనా దొంగిలిస్తే దాన్ని కనిపెట్టడానికి లొకేట్ మై ల్యాప్‌టాప్ (LocateMyLaptop) అప్లికేషన్ ఉపయోగపడుతుంది. ఇది ఆన్‌లైన్‌లో ఉచితంగా దొరుకుతుంది. ఈ వెబ్‌సైట్‌లో రిజిస్ట్రేషన్ చేసుకుని అప్లికేషన్ టూల్‌ని మీ ల్యాప్‌టాప్‌లో ఇన్‌స్టాల్ చేసుకోవాలి. మీకు కనిపించకుండానే ఇన్‌విజిబుల్ మోడ్‌లో ఇది మీ ల్యాప్‌టాప్ మీద ఎప్పుడూ ఒక కన్నేసి ఉంచుతుంది. దీంతో గూగుల్ మ్యాపింగ్ ద్వారా ల్యాప్‌టాప్‌ని ఎక్కడెక్కడికి తీసుకెళ్లారో చూడొచ్చు. ఎప్పటికప్పుడు అలర్ట్ మెసేజ్‌లను కూడా పంపిస్తుంది. ల్యాప్‌టాప్‌లోని సమాచారాన్ని రిమోట్ యాక్సెస్‌తో రికవర్ చేయొచ్చు.
http://locatemylaptop.com

టాబ్లెట్

పోగొట్టుకున్న టాబ్లెట్ పీసీని ట్రాక్ చేసి పట్టుకోవడానికి Prey Anti-Theft టూల్‌ని నిక్షిప్తం చేసుకోండి. ఆండ్రాయిడ్ ఓఎస్ టాబ్లెట్‌లకి ఇది ప్రత్యేకం. జీపీఆర్‌ఎస్, వై-ఫై నెట్‌వర్క్‌ల సహాయంతో వాటాని వెతికి పట్టుకోవచ్చు. సిమ్‌కార్డ్ మార్చేసి వాడేందుకు ప్రయత్నిస్తే మనకు మెసేజ్ అందిస్తుంది. దీన్ని ఆండ్రాయిడ్ మార్కెట్ నుంచి పొందొచ్చు. ఇలాంటిదే మరొకటి Anti-Theft Plug In దీన్ని నార్టన్ సంస్థ రూపొందించింది. దీన్ని టాబ్లెట్‌లో ఇన్‌స్టాల్ చేసి Lock, Locate, Find ఫీచర్స్‌ని వాడుకోవచ్చు. దీన్ని ఆండ్రాయిడ్ మార్కెట్ నుంచి పొందొచ్చు.

యాపిల్ గాడ్జెట్స్

మ్యాక్ : యాపిల్ కంపెనీ ఆపరేటింగ్ సిస్టమ్ వాడుతున్న వారు ఐక్లౌడ్‌ని ఇన్‌స్టాల్ చేసుకోవడం బెటర్. యాపిల్ మ్యాక్‌ని ఎవరైనా దొంగిలిస్తే Find my Mac సర్వీసెస్‌ని ఎనేబుల్ చేసి అదెక్కడుందో కనిపెట్టొచ్చు. దీన్ని యాపిల్ కంపెనీ వెబ్‌సైట్‌లోకి లాగిన్ అయి పొందొచ్చు. రిమోట్ యాక్సెస్‌తో మ్యాక్‌ని బ్లాక్ చేయొచ్చు. డ్రైవ్‌ల్లోని డేటాని తొలగించొచ్చు.
ఐఫోన్ : Find My iPhone ఆప్షన్‌తో యాపిల్ ఐఫోన్‌ని ట్రాక్ చేయొచ్చు. దీని ఆధారంగానే ఐపాడ్‌లనూ కనిపెట్టేయొచ్చు. యాపిల్ ఐస్టోర్ నుంచి వీటిని పొందొచ్చు.