వెబ్‌కామ్ వాడుకున్నోళ్లకు వాడుకున్నంత!

వెబ్‌కెమెరాతో ఏం చేస్తాం? స్కైప్‌లో వీడియో చాటింగ్. అంతేనా కేవలం చాటింగ్ కోసమేనా ఇంకా దేనికీ వాడుకోలేమా? వాడుకోవచ్చు.. రకరకాలుగా. వాడుకున్నోళ్లకు వాడుకున్నంత. అదెలాగో తెలుసుకోండి. 

వెబ్‌కామ్... డెస్క్‌టాప్ కంప్యూటర్‌కు ఎక్స్‌టర్నల్‌గా ఉంటుంది. ల్యాప్‌టాప్‌లు, నోట్‌బుక్‌లు, టాబ్లెట్‌లలో ఇన్‌బిల్డ్‌గా ఉంటుంది. శివుడికి మూడో కన్ను ఉందో లేదో తెలియదు కానీ.. మన పీసీకి వెబ్‌కామ్ ఉంటే మనకు మూడో కన్ను ఉన్నట్లే.. ఎందుకంటే ఈ ప్రపంచాన్నే ఆ కంటితో చూసేయొచ్చు. విఠాలాచార్య సినిమాల్లో దూరదర్శినిలా పనిచేస్తూ.. దేశవిదేశాల్లో ఉన్న మన వారిని సింగిల్ క్లిక్‌తో మన కళ్ల ముందు ఉంచుతుంది. ఈ విషయం అందరికీ తెలుసు. కానీ వెబ్‌కామ్ ఇప్పుడు కేవలం వీడియో చాటింగ్ కోసం మాత్రమే కాదు.. చాలా అవసరాలకు ఉపయోగించొచ్చని చాలామందికి తెలియని విషయం. దీనికి అదనపు సౌకర్యాలను అనుసంధానం చేయొచ్చు. అద్భుతాలను సృష్టించొచ్చు. ఇందుకు కొన్ని అరుదైన సాఫ్ట్‌వేర్‌లు, ఆన్‌లైన్ సర్వీస్‌లను వారధిగా వాడుకుంటే చాలు. మీ ఇంటికి రక్షణ కవచంగా.. బార్‌కోడ్ రీడర్‌గా.. మీ కంప్యూటర్‌కి లాగిన్ పాస్‌వర్డ్‌గా ఇలా ఎన్నో రకాలుగా వెబ్‌కామ్‌ని ఉపయోగించుకోవచ్చు.

నిఘా యంత్రం
మీ దగ్గర వెబ్‌కామ్ ఉంటే మీ ఇంటికి, ఆఫీస్‌కి చిన్నపాటి నిఘా వ్యవస్థను ఏర్పాటు చేసుకోవచ్చు. ఇందుకు ప్రత్యేకంగా రూపొందించిన YawCam అనే సాఫ్ట్‌వేర్ ఉపయోగపడుతుంది. దీన్ని ఇంటర్‌నెట్ నుంచి ఉచితంగా డౌన్‌లోడ్ చేసుకుని మీ కంప్యూటర్‌లో ఇన్‌స్టాల్ చేసుకుంటే చాలు. విండోస్ ఆపరేటింగ్ సిస్టమ్‌లో ఇది పనిచేస్తుంది. ఒక్కసారి కెమెరాని సాఫ్ట్‌వేర్‌తో సెట్ చేశాక నిరంతరంగా ఇది పనిచేస్తూనే ఉంటుంది. కెమెరా రన్ అవుతున్నప్పుడు దీని పరిధిలోకి ఎవరైనా వస్తే మోషన్ కాప్చర్ టెక్నాలజీతో ఫోటోలు తీస్తుంది. లోకల్ ఫైల్‌గా సిస్టమ్ హార్డ్‌డ్రైవ్‌లో వాటిని సేవ్ చేస్తుంది.

ప్రత్యేక ఇన్‌బిల్డ్ వెబ్‌సర్వర్‌తో ఆ ఫోటోలను ఆన్‌లైన్‌లో కూడా చూడొచ్చు. ఇంట్లో ఏదైనా ప్రమాదాన్ని గుర్తించగానే మనల్ని అలర్ట్ చేస్తుంది. దీన్ని www.yawcam.com/downlad.php అనే లింక్ నుంచి డౌన్‌లోడ్ చేసుకోవచ్చు. ViaminD అనేది కూడా ఇలాంటి సేవల్ని అందించే మరొక సాఫ్ట్‌వేర్. దీన్ని పీసీలోనే కాకుండా మ్యాక్‌లో కంప్యూటర్‌లో కూడా వాడుకోవచ్చు. యూఎస్‌బీ కెమెరాలు, నెట్‌వర్క్ కెమెరాల్ని కూడా సపోర్ట్ చేస్తుంది. నిర్ణీత సమయంలో దాని పరిధిలోకి ఎవరైనా వస్తే రియల్ టైం అలర్ట్‌తో మనల్ని అప్రమత్తం చేస్తుంది. దీన్ని www.vitamindinc.com/downloads.php లింక్ నుంచి డౌన్‌లోడ్ చేసుకోవచ్చు.

కోడ్ రీడర్
సూపర్ మార్కెట్‌లో వస్తువులని కొన్నప్పుడు వాటి బిల్‌ని కౌంట్ చేసేందుకు లేబుల్‌పై ఉండే నల్లని గీతలపై ఒక లైట్ వేయగానే ఆ బిల్ యాడ్ అయిపోవడం ఎప్పుడైనా గమనించారా? అదే బార్‌కోడ్.. మాల్స్‌లో బార్‌కోడ్‌లను రీడ్ చేసేందుకు ప్రత్యేక గాడ్జెట్స్‌ని ఉపయోగిస్తారు. కానీ మనం మన వెబ్‌కామ్‌ను కూడా అలాంటి గాడ్జెట్‌గా ఉపయోగించుకోవచ్చు. సిస్టమ్, ల్యాప్‌ట్యాప్‌లలో ఆ పని చేయడం కోసం bcWebCam అనే అప్లికేషన్ ఉపయోగపడుతుంది. దీన్ని మీ సిస్టమ్ / ల్యాప్‌టాప్‌లో ఇన్‌స్టాల్ చేసుకోవచ్చు. లేటెస్ట్ ల్యాప్‌ట్యాప్‌లలో ఈ సదుపాయం అందుబాటులో ఉంది. బార్‌కోడ్, QR Code లను రీడ్ చేయడానికి ఇప్పుడొస్తున్న స్మార్ట్ ఫోన్ల కోసం ఉచిత అప్లికేషన్లు చాలానే అందుబాటులో ఉన్నాయి.

ఫేస్ పాస్‌వర్డ్
వెబ్‌కామ్‌ని ఫేస్ రికగ్నేషన్‌గా ఉపయోగించుకోవచ్చు. మీ పర్సనల్ కంప్యూటర్‌కి టెక్ట్స్ పాస్‌వర్డ్ కాకుండా మీ ఫేస్‌ని పాస్‌వర్డ్ పెట్టాలనుకుంటే ఈ వెబ్ కెమెరాతో సాధ్యమవుతుంది. ఇందుకు Luxand Blink సాఫ్ట్‌వేర్‌ని ఇన్‌స్టాల్ చేసుకుంటే సరిపోతుంది. దీని ద్వారా మీ ముఖాన్ని సిస్టమ్ పాస్‌వర్డ్‌గా సెట్ చేసుకోవచ్చు. జుట్టు లేకపోయినా, కళ్లజోడు పెట్టుకున్నా పర్వాలేదు. ఎందుకంటే ఈ సాఫ్ట్‌వేర్ కేవలం ముఖంలోని కొన్ని ప్రత్యేక పాయింట్‌లను మాత్రమే ఇన్‌పుట్‌గా తీసుకుంటుంది. ఈ సాఫ్ట్‌వేర్‌ని www.luxand.com/blink లింక్ నుంచి డౌన్‌లోడ్ చేసుకోవచ్చు. ఇలాంటిదే బనానా స్క్రీన్ అనే మరో సాఫ్ట్‌వేర్ ఉంది. దాన్ని http://bananascreen.en. softonic.com ఈ లింక్ ద్వారా డౌన్‌లోడ్ చేసుకోవచ్చు.

జస్ట్ ఫర్ ఫన్
చాటింగ్ చేస్తున్నప్పుడు ఆకట్టుకునే బ్యాక్‌క్షిగౌండ్స్‌తో మీ ఫ్రెండ్స్‌ని ఆకట్టుకోవాలంటే VideoSkinలోకి లాగిన్ అయిపోండి. లింక్ : http://videoskin.net. ఇలాంటిదే మరోటి WebcamMax. చాలా ఎఫెక్ట్‌లను వీడియో చాటింగ్‌కి అప్లై చేయొచ్చు. దీని లింక్ : www.webcammax.com/download.html
నవ్వుపుట్టించే ఎఫెక్ట్‌లకోసం.. www.cameroid.com
www.seenly.com
గేమ్స్ ఆడాలంటే...
www.newgrounds.com
www.shiningmorning.com http://neave.com/webcom

- మొదటిసారిగా వెబ్‌క్యామ్‌ని 1991 కనుగొన్నారు.
- ఇప్పటికీ పనిచేస్తోన్న పాత వెబ్‌క్యామ్ సాన్ ఫ్రాన్‌సిస్కో స్టేట్ యూనివర్సిటీలో ఉంది. ఇది 1994 నుంచి పనిచేస్తోంది.
- 1994లో తొలిసారిగా వెబ్‌క్యామ్‌ని క్విక్‌క్యామ్ అనే కంపెనీ మార్కెట్‌లోకి తెచ్చింది. అది 320 / 240 పిక్సెల్స్‌తో సెకనుకు 60 గ్రేస్కేల్ ఇమేజ్‌లను క్యాప్చర్ చేసేది.